०७ पौष २०८१, आइतबार
अभिभावकलाई सन्देश प्रदान गरेको बालमनोविज्ञानमा केन्द्रित गीत ‘छोरीको मर्म’
Sabita Pokharel शुक्रबार, साउन ०६, २०७९
काठमाडौं । एकपछि अर्को हिट गीत लिएर आउने गायक एवं सर्जक हुन् खेम सेन्चुरी । यस्तै पछिल्लो समयमा पनि उनको सार्वजनिक भएको ‘छोरीको मर्म’ तीज गीत हिट हुन सफल भएको छ ।
गीतमा खेमको नै संगीत, स्वर र अभिनय समेत रहेको छ । यो गीत बालगायिका कमला घिमिरेको ‘लरीलरी लै’ भाग ३ का रूपमा ल्याइएको हो । खेम र कमलाको सहकार्य निकै फाप्ने गरेको छ । दुई वर्षअघि उनीहरुको स्वरमा सार्वजनिक ‘लरीलरी लै’लाई स्रोता दर्शकले निकै रुचाएका थिए ।
नेत्र अर्यालको शब्द रहेको ‘छोरीको मर्म’मा खेम, कमलासँगै जानुका तामाङले स्वर दिएकी छन् । प्रकाश भट्टको निर्देशनमा तयार भिडियोमा खेम र कमला स्वयंका साथमा सरस्वती फूयाँलको अभिनय छ ।
दुर्गा पौडेलको छायाँकन रहेको यस भिडियो विष्णु शर्माको सम्पादनपछि ‘शुभारम्भ डिजिटल म्युजिक’ युट्युब च्यानलमार्फत सार्वजनिक गरिएको हो । बालमनोविज्ञानमा केन्द्रित यस गीतले अभिभावकलाई सन्देश समेत प्रदान गरेको छ ।
‘शुभारम्भ डिजिटल म्यूजिक’ नामको युट्युब च्यानल मार्फत सार्वजनिक भएको गीत यतिबेला युट्युबमा ५ नम्बर ट्रेण्डिङमा पर्न सफल भएको छ । यो समाचार तयार पारिरहेको समयमा गीतको भिडियोलाई ७ लाख ७५ हजार दर्शकले हेरिसकेका छन् । २३ हजार लाइक आएको भिडियोलाई झण्डै १५ हजार कमेन्ट आएका छन् । सबै कमेन्टमा समाज बोलेको मर्मश्पर्शी गीत र भिडियो भन्ने भाव सहित उच्च तारिफ गरिएको छ ।
